ملك الموت من دار التونسي للفايس بوك

اليوم أمكم هناني سيقت دارها الجديدة وعاملة شويا بخور .. باش اتنحي ريحة العصبانة إلى طيبتها .. وزيد اتنحي الكساد .. الراديون يشرقع في الكوجينة .. تسمع في خوها البشير رجب والعزايز إلى كيفها يحكيوا على ذكرياتهم .

الباب يدق ، بالطبيعة منيش بنية صغيرة باش انقّز وانقوم ، اتحلحزت من هنا ومن هنا ، وحطّيت يدى على يد البنك ، وناديت النبي والسيد علي باش يعاونوني على القومان..

وقلت : ان شاء خير .. شكون جاني وداري مازال ما يعرفوهاش جماعة الربط

حلّيت الباب نلقي الحاج كلوف يلهث ولسانو طالع

سلّمت عليه وقلتلو: شبيك يا حاج تلهث وكيفاش عرفت الدار

باسني منا ومنا .. بكل حرارة .. لين وجهي حمار وعرقت .. وهبّط برنوسو .. واتعدى طول لبقيعتو على البنك.. من غير ما يقول حتى كلمة

قلتلو : ما قلتليش كيفاش عرفت الدار ؟ و وقتاش رجعت من الخارج؟ وفين سافرت؟

سافرت لبلاد العجايب والغرايب يا هناني .. وهانى رجعت اليوم .. ومن وقت ماعفست الربط .. وانا ندور وانلوّج على العباد إلى نعرفهم ما لقيت حد يا هناني .. وانت شبيك خرجت من الحومة؟

أنا خرجت يا حاج بعد ما لقيتك هجّيت .. قلت الحاج المغبون ،ما ظاهرلي كان باش يرجع .. بعد ما قدرك طاح .. والصغار ردوك كركوز .. والكبار لموا رواحهم في حومة الأكابرية

بالله يا هناني ؟ أنا كركوز ؟ توا جيت باش انفرّغ قلبي بحذاك .. ولّيت تسمّع فيا في الكلام؟

ما تتغشش يا حاج ، ماك خرجت على خاطر لا لقيت روحك لا مع الصغار ولا مع الكبار .. وزيد خفت من ملك الموت .. اشرب قهوتك .. هانيا بالزهر كيف ماتحب

وانت خليت فيها زهر يا هناني .. أنا راني مانيش مطوّل القعدة .. بالطبيعة نخاف من ملك الموت إلى ماهو مخلّى حتا كبير .. صحيح وإلا مريض .. يهز فيهم على بعضهم

ضحكت وقلتلو : ملك الموت يا حاج يا خويا راهو موجود في كل بلاصة .. كيف اتجي ساعتك .. ان شاء الله تكونش في كرش خليقة بوك .. يقتلك ، يقتلك

ضحك وقال : حتى انت وليت تعرف خليقة بوك يا هناني؟ يقولولوا الفايس بوك يا جاهلة ..

يقولولو إلى يقولولوا .. وجه بوك ، خليقة بوك ، فاس بوك .. المهم ملك الموت موجود .. هيا احكيلي شنوا لقيت في هاك البلاد؟ راك تفرهدت وعملت بعمايلك .. ماني نعرفك تموت على التوريست ..

اتنهّد وقال : بلاد كبيرة يا هناني .. بلاد عظيمة .. تلقي فيها البشرية الكل .. الألوان الكل .. تقول العالم اتصب فيها .. والوحدة والتضامن عاملين حالة

صحة ليك يا حاج .. والله شهّيتني باش نزورها .. كاينك تحكيلي على دبي .. قالك ، دبي حفرت في البحر وعملت بلاد كاملة .. وزيد في كل بلاصة ماخذة شويا سماء وتتشعبط فيها ..

مالا شنوا إلى رجعك للربط ؟ كيف انت لقيت الجنة والأصحاب والأحباب في خليقة بوك الله يرحمو وينعمو..؟ والناس الكل حبيبات .. ويحبوا بعضهم .. ويضحكوا لبعضهم .. وعاملين جمعيات خيرية يلموا فيها في مليون صديق وصديقة؟

شيء يا هناني .. إلى فيه طبّة ما تتخبى .. العرك والمعروك .. وملك الموت .. موجودين كيف ما خليتهم في الربط .. وزيد الجيشوش إلى عاملينهم في الفايس بوك ، يا هناني أختي !!!.. يحاربوا بيهم في بعضهم .. وعددهم أكثر من عدد جيوش بلدان العالم .. كل ما يطلع جيش .. من غدوة يتكون جيش ضدو .. شيء فوق الطاقة يا هناني..

شفت يا حاج؟ ماهم شباب ومتعطشين للخدمة متاع الجيش .. تلقاهم ما لقاووش بلاصة في جيش بلادهم .. وإلا الرافل ما لقاهمش .. والسلاح موجود عندهم يا حاج؟ الحمد الله انت ماكش في عمر الجيش ولّا راهم استدعاوك معاهم..

ربي يتولاك يا هناني .. ديمة اتحب اتطيّحلي في المورال .. لا يا للا ، الجيوش الكل بعثولي باش نكون معاهم

ووه يا حاج ، راك رتريتي في الجيش متاع الإستقلال .. كيفاش يستدعاوك للعسكر ؟ .. مالا راك قلتلهم إلّى انت من جماعة جيش الإستقال ..

ما نكذبش عليك يا هناني .. شاركت في برشى جيوش .. وساعات تلقاني مشارك في زوز وإلا ثلاثة جيوش يحاربوا في بعضهم .. وقعدت مرة انحارب مع هاذم ومرة انحارب مع لخرين..

وكانك على الرافل وملك الموت ما همش غافلين حتى في الفايس بوك .. والسلاح الموجود عند الجيوش هاذم الكل ، هو فوشيك عطاهولهم امبراطور الفايس بوك إلى هو مولاه .. أما السلاح الرسمي ماهو موجود كان عند الإمبراطور، وملك الموت إلى يعمل في الرافل.. وجماعة السلاح النووي

والله رعبتني يا حاج كلوف .. مالا عاد كيفاش تقلي بكلها حب وبوس وتعنيق .. وورد .. وغناء .. وتفدليك .. تهاي ترعب هالبلاد .. خليني مالا نمشي لدبي نحفر في ماها ،ونمس سماها خير