الترشّح للبلديات سوق ودلال للبطاقات

هالنهارين الربط تقول عليه سوق ودلال .. الناس خايضة .. ماشية جاية ، تخبّل العينين.. لابسين البنفسجي وداخلين خارجين، ودزني واندزّك، لحانوت شيخ الربط

كيف تقربلهم .. ما تسمع كان .. كارطة .. زوز كوارط .. ثلاثة كوارط.. أعطيني الكارطة متاعي .. ما عنديش الكارطة .. فين الكارطة.. لا ماتنجّمش تاخذ الكارطة .. الكارطة والكوارط ..الكارطة والكوارط .. تقول عليك في كازينو قهوة عمر في عاصمة الثقافة الإسلامية

كيف مانقولوا الدنيا ما تدوم لحد .. ولا حال يدوم رمضان البارج والعيد اليوم.. بدات الترشحات لدار الزبلة والخروبة .. وبدى معاها

العرك والمعروك .. بين جماعة تونس أولا .. بعد الحب والإحترام .. والبوس والتعنيق .. إلى كان بيناتهم ..

توا سنين وشيخ الربط وهو من زنقة لزنقة ومن تركينة وتركينة يستقطب في الكفاءات .. المسكين تلقاه صباحا مساءا ويوم الأحد يلوّج وفي يدو شمعة .. ما يخليش كفاءة بلاش كوارطها ... لكن رغم هالمجهود الكل ، سبحان الله وقت ما يجي الربط حاجتوا بالكفاءات .. يظرب عليهم ما يلقاهم .. كيف مانقولوا .. تقول الأرض تشقّت وبلعتهم ..

هالنهارين في الربط ، في كل زنقة باش تتعمل مسابقة اللص يهز الكل..والمشاركين فيها ينجموا يربحوا كرسي في دار الزبلة والخروبة .. لكن مع الأسف، الكوارط متاع دخول المسابقة موجودة عند شيخ الأربعين .. راقد عليهم .. ما يمشكي كان هو .. وما يعطيهم كان لقدماء الملاعبية .. ورؤساء لجان الزنق ..سواء كانت الزنقة طويلة وإلا قصيرة ..

وباش ما يغشش الكفاءات الشابة إلى يزيّن بيهم المحضر .. وعدهم إلى في عام 2015 يدخلهم في لعبة اللص يهز الكل، كان قعدوا عاقلين وخذاو شهادة مهنية في الغباوة والتكمبين والتخلّف