هناني بدلت مرايتها بتونس7

هناني اليوم كسرت المرايات إلى عندها في الدار.. دششتهم ورماتهم من الشباك .. ستر ربي ما جاوش على راس أمي سيسي إلى قاعدة تكنس تكنس

الحاج كلوف داخل للزنقة .. يلقي سيسي تكنس تكنس،. سألها وقاللها: شنوا هالقزاز يا سيسي .. شكون جاه زلزال طيّحلو البلار متاع دارو؟

سيسي من غير ماتهز عيناها من الأرض ، تخاف لا ما تشوفش الفليّس.. قالتلو:
 طاح من دار أختي هناني

تفجع الحاج وقاللها : كيفاش ؟ مالا المسكينة راهي حايسة وحدها .. خليني نمشي نشوفها تكونش تجرحت ، وإلا صارتلها حاجة

مشي الحاج كلوف يجري .. يدز في ساقيه الثلاثة .. وصل لدار هناني .. دق الباب وهو ينادي : يا هناني حل الباب هاني جيت

هناني خطوة خطوة خرجت وحلّت الباب

شنوا حوالك يا هناني ، شنوا عمل فيك الزلزال؟ جرحكش البلار؟

هناني باهتة ، ماهياش فاهمة الحاج كلوف فاش يحكي؟ قالتلو : اللطف عليك يا حاج يا خويا .. شنيا حكاية الزلزال اللطف ، ماتقليش جاك زلزال في دارك؟

قاللها: أنا لاباس عليا.. مالا شنوا البلار إلى هبط من دارك، في الشارع .. وسيسي

تكنس تكنس فيه؟

ضحكت وقالتلو: لا يا حاج لا زلزال ولا شيء ما صار .. أنا كسّرت المرايات متاع بيت البانو .. ومتاع الكولوار .. ومتاع الكوافيز

علاش؟ شنوا صادك؟ جاك العصب عليهم؟

لا يا حاج .. لا عصب ولا تنرفيز.. في راحة من عقلي كسّرتهم .. ما عادش حاجتي بيهم يا حاج .. ما عدتش نحب نشوف روحي في مرايا تظهرّلى في العيوب متاعي

كيفاش يا هناني .. مالا كيفاش باش تشوف شعرك مشعشط وإلا لا؟ طلع الشيب وإلا لا؟ وجهك ناير وإلا أصفر وملخلخ؟ وكيف تجي تعمل شويا حمّير وكحل، كيفاش باش تعمل؟ .. ماتقليش باش تشري مرايا مطلعة تظهرك مزيانة حتى كيف تكون كيف العبيثة؟

جاوبتو وقالت: اليوم يا حاج سمعتهم يقولوا في الراديون ، إلى الراديون والتلفزة والجريدة وهاك الأنتر- ناتن ..هوما المرايا متاع جماعة الربط الكل .. كل وحدة تحب تشوف روحها تحل وحدة منهم .. بقدرة الإلاه ماتشوف كان الخير

الحاج ماهو فاهم شيء، غزرلها وقاللها: أولا نقولوا أنترنات موش أنتر ناتن .. ثاني حاجة ربي يحبّس عليك العقل والدين

شوف يا حاج .. شوف صورتي في التلفزة .. شوف قدّاشني كل شيء بكمالو.. لا تظاهيني لا العربية ولا القاورية .. القانون يحميني ، والعقلية تدفّيني.. شوف تصويرتي وتصويرة أختي سيسي قداش مزيانة وفرحانة

يظهرلي المرض متاع الشيزوفرينيا بدى يعمل مفعولو يا هناني أختي .. يلزمني نهزّك للطبيب خير ماتولي نعاني فيك.. وترصيلى كيف نجي نحكي معاك ، ترصّيلي نحكي معاك ومع جماعة باسم الله.. وتوا بدّل عليا تونس7 خلّينا نشوفوا قناة حنبعل وإلا هاكلى تتكلّم بالسوري أكثر من العربي

لا يا حاج، يعيّش خويا خلّيني زاهية وشايخة بروحي .. المرايات هاذوكا.. تقول عليهم عندهم بونتو بالربط..كيفهم كيف مراية الكوافيز إلى كسّرتها ورتحت منها

السكّر طلع للحاج .. قام مترهوج .. شد عكازو .. وقال لهناني: اسمع يا هناني ننصحك تمشي للطبيب .. وتشري مرايا باش تشوف حالك وحوالك.. ماكانش بالحرام إلا مانحرّم عليك الخروج من الدار ... وانردّك تتكلّم مع تصويرتك إلى في تونس7

من غير ما تحلف يا حاج .. أخرج انت واشبع بالوسخ والمشاكل متاع الربط .. أنا من اللحظة هذه .. ماني باش نشوف ربطنا كان في مراية تونس7 .. الزين والعين والنظافة والتربية والإحترام .. الناس الكل تحب بعضها، ولّى يتكلّم الناس الكل تجاوبوا " نحب" وترفع صبع الإبهام

الحاج طاح ما عادش ينجّم يزيد مع هناني حتى كلمة .. اتبكّش المسكين .. خرج وهو يستغفر ويطلب لهناني بالشفاء وباللطف