lundi 15 mars 2010

غسل الصابون ونشرانو ليه أمّاليه

الربيع ربع واللبن قراص .. ولى عندو بنية يعطيها لتراس .. الشميسة زارقة .. والرؤية واضحة .. هناني غسلت صابونها ونشرتو في البركون .. وزادت خرجت الزرابي باش يضربهم الهواء ..كيف مانقولوا... وكيف العادة تهبط تتمشي شويا على الكرنيش .. تكحّل عويناتها بالبحر وهاك التوريست

هي ماشية على رويحتها .. لقات الحاج كلوف كيف العادة .. يبزنس على بنية توريست
 
قربت منهم ونادات للحاج: يا حاج كلوف .. قالك أسئل على صاحبك استغناش ، آما الطبيع ما يبدّلهاش

الحاج كلوف يظحك ويقوللها: يا هناني أختي ماتكونش نيتك مقعمزة.. البنية هذه جات لبلادنا في عام الشباب.. وانا قاعد نحكيلها على حضارتنا وتاريخنا المجيد

هناني: يعطيك الصحة يا حاج.. مالا هزيتها للمتحف .. و وريتها جدودنا شنوا عملوا؟

الحاج: ماتحبّش تمشي للمتحف يا هناني قالتلي التاريخ موجود في الكتب ..تحب كان تدور في الزناقي متاع الربط .. باش تعرف كيفاش نعيشوا

هناني: علاش يا حاج تحب تعرفنا كيفاش عايشين؟ تكونش ناوية تعرّس بواحد من الربط؟

الحاج: فين تعرف يا هناني ، بالكشي ناوية على العرس .. قالتلي تعرفت على برشى شباب في حانوت مكينة الغسيل متاع الدبش.. وعجبوها.. وتحب قبل ما تتورّط مع واحد فيهم تتعرّف على عيشة الربط

هناني: والله يا حاج محلاهم هالتوريست .. بالله يا حاج ماتوريهاش الزناقي .. خليها تشوف كان بقايع التوريست .. الزناقي ما فيهم ما يتشاف ...بكلو صابون منشور .. والثنايا تهز ساق تتفصع لخري بالحفر إلى فيه.. بيضلنا وجوهنا ، ربي يبيّضلك وجهك دنيا وآخرة

الحاج : شفتني دهان وإلا بيّاض عندك يا هناني؟ البنية شايخة وهي تصوّر في الزناقي والبراكن .. شوف شوف كيفاش تصور في بركونك بالتركينة بالتركينة

هناني شاخت وقالت: مالا عجبها بركوني؟ حتى أنا اليوم عبيت الشرايط بالصابون والزرابي
وشدّت التوريست من يدها وبدات تقوللها: هذيكا زربية متاع العاصمة الثقافية.. كل عروسة ما تخرج من دار بوها كان ما تخرجها في زهازها .. مزيانة لكنها بنيتي تهد الحيل كيف تجي اتنظّفها.. وهاذاك مرقوم الصحراء وجمالها.. وهذيكا التخليلة التقليدية للسواحلية.. وهذاك مريول فضيلة .. ولى بحذاه سروال بالقندليسة متاع الحاج.. ومريول خلعة ,ووو

هوما هكا وهناني شايخة تسمي بالقطعة بالقطعة في صابونها المنشور.. وأمك سيسي تصب الزيت

الحاج: فاش تعمل يا سيسي ، شبيك قصيت على الكنسان؟ تكونش لقيت الفليّس؟
سيسي: لا يا حاج ، لا لقيت لا فليّس ولا خروبة.. حانوت شيخ الربط خايض بجماعة الزبلة والخروبة وغسالة الصابون

الحاج وهناني ما ينجموش يخليوا خوضة من غير ما يدخلوا فيها.. يهزوا رواحهم ويمشيوا لحانوت شيخ الربط

شيخ الربط: اليوم المرأة في عيدها.. لازم ترتاح من تخريج الزبلة ،وغسيل الصابون والنشران

هناني: الحمد لله على دين الإسلام يا شيخ.. هاو في عيدنا باش ينحيوا علينا تعب تخريج الزبلة .. وغسيل ونشران الصابون.. والله يا حاج ربطنا لا كيفو لا في السند ولا في الهند

الحاج: علاش يا شيخ ؟ ماتقليش ناوين باش الراجل يولي يغسل وينشر الصابون ؟

الشيخ: لا يا حاج ماتخافش.. لا الراجل ولا المرأة باش يغسلوا صابونهم .. عندنا ناس مختصين ، خدمتهم في الغسيل والتشليل والنشران .. ما عليك كان تعمل اشتراك معاهم

هناني: يرحم إلى قري ووري.. حتى الغسيل والنشران لازمو شهادة تخصص

مختص في غسيل الصابون ونشرانو:: يا هناني الغالية.. أحنا بعد ما شفنا إلى مكينات الصابون تهلك في الدبش.. والشرايط معبية بالدبش المنشور من غير جمال ولا تناسق مع الهندسة المعمارية العربية الإسلامية لبلادنا .. قرّرنا باش نوعيوكم ونقولولكم ما عدتوش تستعملوا مكينة الصابون إلى تهدر في الطاقة .. وتخليونا أحنا المختصين نتلهاو  بغسيل صابون الربط الكل ..بالطريقة إلى تتماشى مع ثقافتنا وأخلاقنا إلى تربينا عليها ، والمتمثلة في غسل الصابون في قصعة نحاس .. مع تعصفيرة الراس، وتشمير التريكو والسروال.. وإلا الجيب والبنوار.. ونرجعوا قيمة وقدر طلية الصابون وعملية النشران
 
الحاج كلوف: قالك إلى خانها ذراعها تقول مسحورة

مختص في الغسيل والنشران: شنوا قلت يا حاج؟ شبيك اتمتم وحدك؟

الحاج كلوف: لا ما قلت شيء ، نسأل زعما قرّاوكمش الغسيل بالماكينات؟ .. وعلى كل بالله كيف تبعثولي بنية باش تغسلي صابوني وصابون هنونة ، انحبها تغسل كيف هيفاء وهبي .. وإلا شكوني هاكلى عاملة غناية وهي تغسل في الصابون

هناني: أنا يعيّش ولدي انحب إلى باش يغسلي صابوني يجيني انوريه البقايع قبل ما يبدى فركة الصابون.. وماذابيا يكون روحو خفيفة ويفهمها وهي طايرة

المختص في الغسيل والنشران: المهم يا حماعة تبطلوا الغسلان بالمكينة.. واحنا ما نخليوكم كان وصابونكم نظيف .. وما تسمعوا علينا كان كل خير سواء في الجرايد وإلا في التلفزة

6 commentaires:

  1. آآآآآه يا هناني شهّيتني في دولاشة على الكرنيش نسرّح نظري في البحر و ماعاد نلوّج على شيء

    RépondreSupprimer
  2. شنوا رايك تجي بحذايا ؟؟ هيا تشجّغ ويجى نهيرين .. وعدتني لكن لتوا ما وفيتش

    RépondreSupprimer
  3. يعيّشك على الدّعوة أما الّي عظامه عظام شقا يمنّي روحه بالرّاحة و الرّاحة بعيدة
    إن شاء الله نجيك في الفرح

    RépondreSupprimer