samedi 6 mars 2010

هناني هداها الفيديو وباش تلبس النقاب

بعد نهارين يحتفل العالم باليوم العالمي للمرأة .. العالم الكل باش يكون مزهزق بالفرحة .. هناني كيف العادة، فين فمة عيد.. تهبّط حيوط الدار كيف مانقولوا.. تنظّف التراكن .. وتشري عصبانة لنهار العيد.. ماهو ما يجيش عيد من غير عصبانة
مشيت للجزار متاع الربط .. لقيت بحذاه راجل سبحان الخالق آش خلق .. طول وعرض وزين وقد .. السروال الدجين من الغالين.. التريكو مكتوب عليه كلام بالشرشار ..والشعر واللحية إلى محجمين على الموضة .. وفوق هذا الكل الريحة إلى تشمها من بعيد.. غزرتلو وصليت على النبي في قلبي
 
بعد ما سلّمت ووشحلت ، قلت للجزار يعيّش خويا نحب على عصبانة باهية .. فيها كبدة كاملة
سألني الجزار وقالي:
شنوا عندك يا هناني .. شنيا المناسبة إلى باش تعمل فيها عصبانة؟؟ تحبها كبيرة وإلا صغيرة؟
جاوبتو: بعد نهارين عيد المرأة .. وانحب نعمل عصيبنة للى باش يجي يهنيني
الراجل إلى كان وجهو ناير، صفار وزراق
أنا مانخبيش عليكم، ترعبت من صفورية وجه الراجل .. تصوّرت السكر طاحلو .. وإلا جاه بوصفير
قربت منه وقلتلو: شبيه وجهك صفار .. اللطف عليك
 
جاوبني وباقي بهاك الصفورية في وجهو : أوّل حاجة يلزمك كيف تدخل لبقعة تقول السلام عليكم .. ع السلامة هذه مهياش التحية الصحيحة.. هذه شالوم متاع اليهود .. ثاني حاجة العيد هذا موش متاعنا المسلمين
ضربت على صدري وقلتلو: ووه يا وليدي .. ماتقليش ع السلامة جاية من بلاد الكفار!!! .. وخلاتك تصفّر عليا في وجهك وانا في مقام أمك
كشاشو زادت طلعت وقالي: كان جيت في مقام أمي راك حرة .. ولابسة النقاب
- وووه يا وليدي .. شكون قالك إلى أنا مانيش حرة وزينة الحراير .. وهاني أمّيمتك جاية نشري في عصبانة لعيد النساء الحرة
استغفر الراجل واستعوذ من الشيطان ، وزاد تغشّش وقال : كان جيت حرة راك لابسة النقاب.. موش معرية راسك وخارجة للشارع تبيع وتشري في عصبانة
أحنا هكا وخويا الحاج كلوف صب الزيت .. نقلكم الحق ترحمت بيه .. الطفل يقلي في كلام صعيب مانيش فاهمتو.. ماهي قراية توا موش كيف قراية وقتي
اتلفّت الحاج للراجل وقالو: شبيك يا سيّد صوتك طالع لراس الزنقة .. ماك لاباس؟؟
جاوب السيّد وقالو: شفت يا حاج شنوا عملوا الكفار فينا .. شفت كيفاش خرجوا النساء متاعنا من دين الإسلام؟
الحاج كلوف: كيفاش الحكاية ؟ .. فين سمعت الخبر؟ أنا توا كنت نسمع في
الراديون ، ونشوف في التلفزة وما سمعت شيء على هالخبر
الراجل: تلقاك قاعد تسمع في إذاعات وتتفرّج على التلافز إلى يتبعوا في الكفار.. شوف يا حاج هالمرأة هذه كيفاش خارجة عريانة .. وجاية تشري في عصبانة باش تحتفل غدوة بعيد عملوه الكفار
اتلفتلي الحاج .. هزني حطني بعينيه .. تقول عليه يفركس في حاجة .. واتلفّت للراجل وقالو: كيفاش هناني عريانة ؟ تهاي كيف عادتها لابسة روبتها المستورة وشلاكتها .. فين العراء إلى تحكي عليه؟
جاوبو الراجل وقال: عريانة يا حاج .. الدين متاعنا يقول الحرة لازم تكون لابسة النقاب .. باش نتفاداو الفتنة
من غير ما نشعر ضحكة وقلت للحاج: شفت يا حاج؟ ماني قلتلك مازلت في وجهي مانوري وفي زنودي مانعري.. هاو حتى الشاب الترنكوش هذا تفتن بيا
الحاج هز عكّازو وقالي: اسكت يا بنتي راك ماكش فاهمة شيء .. قالك إلى انت وأمثالك سبب الفتنة عند المسلمين.. وماك تعرف الفتنة أشد من القتل
غزرت للراجل وقلتلو: اللطف على ولدي من القتل .. والله كان جيت نعرف شرياني للعصبانة باش يعمل في المسلمين هالفتنة راني شريت شويا حوت وعملت مشوي نهار عيدنا
الراجل تقول عليا حطيتلو زوز خيوط ضو.. اتهز وتنفض وقالي : الحبيب بورقيبة والكفار هوما السبب .. ربي يهلك الكفار أكثر ماهم مهلوكين
 
واتلّفت للحاج وقالو: شوف يا حاج ، لازم تحرّر الأمة متاعك .. تبطّلها من الخدمة .. وتلبّسها النقاب .. وهاني باش نعطيك عنوان حرة منقبة توا بقدرة الإله تهديكم لما فيه الخير للإسلام والأمة الإسلامية .. وبهكا نقضيوا على الفتنة مرة وحدة .. وتتقدّم أمة الإسلام
الحاج بعد ما سمع الراجل .. هز عكازو وقال: مالا طلع تخلّف المسلمين في العلم والأدب والفلفسة والفنون والسياسة .. وموافقتهم دخول جيوش الكفار لبلدانهم باش يكسروا بلاد مسلمة .. واحتلال الكفار للقدس .. والإرهاب متاع القاعدة والواقفة .. والعداوة وكره المسلمين لبعضهم .. وانقسامهم على فوق السبعين ملة توا قرون.. سببها المرأة ؟ شوف يا سيدي ماقواهم هالنساء
هز الراجل راسو وقال: إيه يا حاج .. سبب الفتنة هي المرا .. والكفار شادين صحيح باش يخليونا ديمة في فتنة ومضيعين حالنا واحوالنا .. لكن الحمد لله وبعون الله هانا قاعدين بالتكنولوجيا متاعهم نرجعوا في النساء المسلمات للدين
الحاج قالو: هيا سيدي على يديكم انحجوا .. كيف مانقولوا : توا العصفور يزقق بوه
الراجل مد اسطوانة من جيبو، ومدها للحاج كلوف .. واتلفتلي وقال: كيف تولى كيف المرأة إلى في القرص وتلبس النقاب .. يولي الحاج يجيبلك لحد كوجينتك كل
يوم عصبانة ..و تحتفل كل يوم بعيد حريتك
خرجت أنا والحاج كلوف من غير ما نشري عصبانة .. ومشينا نجريوا باش نتفرجوا على الفيديو .. ومانضيعوش وقت خارج الإسلام الصحيح
أحنا حلينا الفيديو ولقينا المرأة لابسة نقاب الله مصلي على النبي عليها .. كان عويناتها اتبرّق.. تقول من دنيتها لجنّتها .. وقعدنا نسمعو في النصايح متاعها ..
بعد تقريب دقيقة .. بديت نتمحمس .. والحاج كلوف لكفت راسو بالبرنوس .. شويا أخري .. بعدت شويا وجيت قعدت في بقعة بعيدة على عينين الحاج .. الحاج زاد تغرس في البنك وما عدت تشوف منو كان العينين .. لين قمت وما عدتش انجّم نسمع كلام مانيش مستانسة نسمع فيه في تلافزنا إلى عاملينها جماعة الفتنة وما تابعهم
أنا في الكوجينة ونسمع في الحاج يتنطّر من البنك ويصيح: فينو ولد الكلب .. لازم نخلط عليه في حانوت الجزار ... بالحرام يا هناني كان نهار نشوفك لابسة النقاب وتحكي في هالكلام إلا ما نقتلك وانباصي عليك
علاش يا حاج؟ تحب المسلمين يقعدوا لنهار القيامة في فتنة؟ ربي يهديك يا حاج يا خويا .. كان الدنيا دنيا راهم النساء المسلمات الكل لابسين النقاب.. وأحرار كيف هالشيخة
خليها الدنيا موش دنيا يا هناني .. توا مانيش معاك .. خليني نخلط على السيّد

بالله لا يا حاج .. لا إلاه إلا الله.. لا حياء في الدين يا حاج .. سبحان الله .. تشنوا قالت المسكينة؟ قالت إلّى المرأة يلزمها مع راجلها تــــــ

بالله يا هناني!!! ماتقليش باش تقلي شنوا قالت!! و تعاودلي كلامها،والله لا تحشم ..
عندك حق يا حاج يا خويا .. خليني نمشي نلبس النقاب ومن بعد نجي نحكيلك شنوا قالت الشيخة ونتناقشوا فيه

والله يا هناني كان مازلت تمشي تشري عصبانة إلا ما نتفاهم معاك .. وهالدار لا عدت نعفسها .. وتوا خليني نخلط على العصبانة الناتنة
موش قلتلي ماتحبّش العصبان يا حاج؟
وهو فمّا عصبانة ناتنة غير هاك السيّد متاع الفيديو؟

3 commentaires:

  1. يزي يا مرا ما تعمل هال العملة، شكون قالك نحبو نتخلصو من الفتنة؟ ماهو اتثقف من الفيديو كان لزم و حدّك حد ثم، اما خبيها ها اللقية، ما توريها لحد هالدروس يلزمها تكون خصوصية كان للحبيبات و بالعملة الصعبة كان ما تحبش

    RépondreSupprimer
  2. يا هناني في الفيديو ما هوش شبيّب ترنكوش الّي قاعد يدافع على النقاب!! هاذي هاي مراة كيفك كيفها, و بالنسبة ليها, حاشاك تتسمّى عريانة و سافرة

    هيّا سايسو بعضكم يا نساويين, وجعتولنا روسنا بحكاياتكم.

    RépondreSupprimer
  3. @illusion
    ههه سمعتهم يقولوا والله أعلم
    @Soufiene
    قلت الشبيّب الترنكوش على خاطر شفت برشى كيفو يدافعوا على كلامها في الفايس بوك
    حتى أنا بالنسبة ليا عريانة قريانة هههه

    RépondreSupprimer