lundi 1 mars 2010

المقارنة رجعتني للتدوين

غبت على دار التونسي مدة طويلة.. وغيبتي كانت أسبابها منها الشخصية ومنها الموضوعية .. معناه شويا من الله وشويا من عبد الله .. شويا من كوني دخلت في تجربة كتابة في ميدان آخر .. وشويا من الأجواء وقتها.
لكني هالمدة وبالضبط نفس فترة 2008 إلى عرفت فيها عالم التدوين .. حسّيت برغبة في العودة .. رغبة في القيام بتجربة ثانية .. ما نعرفش كان باش تكون مثل التجربة الأولي ، أو أحسن ، أو أسوء .. لكن هذا ما يمنعنيش باش نعيش تجربة ثانية ..
في الحقيقة الرغبة هذه جاتني بعد ما شفت وتأمّلت وقارنت
 التدوين واستغلال الأنترنات بين تونس بلادنا وبلدان عربية أخري .. قارنت ولقيت إلى الفرق بيناتنا قاعد يمشي ويكبر وبسرعة كبيرة .. لكن مع الأسف الفرق هذا لصالحهم .. والتنسنيس والبحث عن المقارنة ، كان لما فكّرت مع صديقات في تطوير وسائل التعريف بجمعية أنا متطوعة فيها .. وكذلك التفكير في بعث جمعية ..
لقيت الجمعيات وخاصة في الخليج أغلبيتها ـ كل جمعية عندها مواقع محترمة جدا .. ومدونات .. ومنتديات .. وفايس بوك .. ووو ، وأخبارها محينة .. وحتى التبرّع يكون عن طريق مواقعها الإلكترونية
من المفارقات الغريبة أن المدونة الأولى .. بديتها في فيفري 2008 وانا وقتها مقتنعة إلى أحنا التوانسة متقدمين على الخليجيين في عالم استعمال التكنولوجيا .. وكنت فخورة بكونا متقدمين على برشا دول عربية ..
لكن بعد سنتين فقط ... والوقت يجري .. المدونة هذه بديتها وانا حاشمة من مستوانا في استعمال الأنترنات .. حاشمة من مستوانا في توضسف الأنترنات .. حاشمة من القطار إلى قاعد يتقدّم بغيرنا ، واحنا مانا قاعدين كان نتنفسوا كورة,,
عاد قرّرت باش نرجع لدار التونسي .. ونستغل كل لحظة نعديها قدام الكمبيوتر .. ننشر أي حاجة ، حتى ولو كانت نكتة .. ماهي مرة تصيب ومرة تخيب ..

7 commentaires:

  1. Re bien venue. Je connais pas ton premier blog, mais avec ma petite expérience dans ce monde, je pense qu'écrire fait toujours du bien et ça donne envi de faire et de défier beaucoup de choses même en nous.

    RépondreSupprimer
  2. @illusion
    شكرا على مرورك وعل التعليق
    على كل أنا مقتنعة بأن الأنهار تتكوّن من قطرات .. وان شاء الله نكون قطرة في نهر التدوين التونسي

    RépondreSupprimer
  3. اهلا وسهلا ونورت يا مرى ليك وحشة :))

    RépondreSupprimer
  4. مرحبا بالحباب ,, هوكا كيف ريتكم نسيتوني ، قلت خليني نرجعلهم ونتفاهم معاهم
    بالحق ليكم وحشة

    RépondreSupprimer
  5. مرّة أخرى مرحبا و لو أنّك ما غبتش لحظة على البال

    أنا نحبّ نحييّك على زوز مواقف شجاعة و صدق

    ـ الأوّل : هو إنّك ولّيت تدوّن باسمك

    ـ الثاني : هو الموضوع الّي طرحته في تدوينتك هذه ، فعلا الاعتزاز برشة يولّي ساعات شوفينيزم و يصوّرلنا أنّا ديما و بالضرورة خير مالعباد و لكن مصارحة الذات و مواجهتها بعيوبها شيء لازم إذا نحبّو نصلّحو
    و هذا شيء قلناه و نقولوه ديما فمّاش ما نحقّقو شويّة نضج في تعاملنا مع الانترنات

    مواصلة موفّقة في مسيرتك التدوينيّة

    RépondreSupprimer
  6. شكرا ولادة ، ملاحظاتك شرفتني وزادتنى شحنة وإصرار باش نواصل
    أما بالنسبة للتدوين باسمي الحقيقى فهو لأنى مقتنعة كونو العمل البسيط هذا شيء مهم ليا ولبلادي .. وما عنديش علاش انخبي اسمي
    والإعتراف بالحقيقة راهي فضيلة .. ويلزمنا نعرفوا حقيقتنا باش نخدمو أكثر وانقدموا .. يلزمنا نشوفوا غيرنا فين وصل وكيفاش يخدم باش نعرفوا حقيقتنا .. ويزينا من أحنا خير وأحنا خير
    والله يا ولادة ، نبدى وحدي ، وكيف نشوف المواقع متاع بلدان خليجية سواء في الشكل أو المضمون نحس بالقهرة وبالحشمة
    وربي يقدّر الخير

    RépondreSupprimer