صالح سعود الأطلسي ، إعلامي مغربي يقولها علنية: الشعوب العربية هشة وولائها للخارج لا لأوطانها

البارح في برنامج الإتجاه المعاكس ، جاء صحافي مغربي ، ومدوّن شاب جزائري..  باش يتحاوروا في موضوع حرية التعبير 

الإعلامي الفذ المغربي، رغم إلى ولدو مدوّن.. يقول بالحرف الواحد وبالصوت العالي أن الشعوب العربية "شعوب هشّة".. والبلاد العربية "بكلها ألغام".. والمواطن العربي.." ولائه للخارج أكثر من ولائه لبلادو"هذاكا علاش يلزم تطويقه بتطبيق واحترام القانون

حكاية تطبيق القانون هذه، كلمة حق أريد
بها باطل كيف مانقولو..  صالح سعود الأطلسي ، ما خلاش لا الشاب المدوّن ولا مقدّم البرنامج يقولو معاه كلمة.. اتقول عليه كلب مربوط (حاشاكم) واتسيّب.. يبرّر في عملية إغلاق المدونات، وسجن المدونين والصحافيين من أجل أفكارهم .. بأن الشعوب هشّة وولائها للخارج أكثر من ولائها لوطنها

أنا في الحقيقة، يمكن باش نبلع أي قصة يحكيها إلى يدافع على السنسرة، وتسكير كل فم أو مدونة أو جريدة .. لكن تكون القصة باتهام الشعوب العربية بالهشاشة وولائها للبلاد الأجنبية .. مانجّمش نبلعها.. انغص بيها، توحلي في حلقي..

باهي يا سيدي ، أنا مانفهمش شنوا صاير ، والحقيقة هي كيف ما قالها ممثل النخبة الواعية المغربية أو المغاربية.. شكون المسؤول على الهشاشة هذه ، وعدم الإحساس بالوطنية؟؟

ماتقولوليش أنا المسؤولة؟؟ .. لاني حاكمة، ولاني مسؤولة (غير على داري) ولاني من النخبة المثقفة

السيد الأطلسي  المسكين جاء يطبها عماها كيف مانقولوا.. جاء بحجة يدافع على القانون، يخي حكم على الشعب العربي بالعمالة والخيانة والهشاشة ،.. وإذا كان ممثل النخبة والسلطة يقول هالكلام ، مالا علاش نلوموا على الغرب كيف يمارس العنصرية معانا ويصفنا بالغباوة والتخلّف والإرهاب؟

أنا متأكدة كونو شخصية وغباوة صالح سعود الأطلسي ، موجودة في كل البلدان العربية ..وتعمل على اخماد الصوت و الفكر المخالف.. وهذاكا علاش لا تلقي إبداع ولا نقاشات في المستوى .. والشعب يتنفس كورة

بكل أسف وقلب موجوع نقولها.. البارح، تمنيت لو لم أكن عربية